Dómstólaleit

Dómur

Mál þetta, sem dómtekið var 1. apríl sl., var höfðað með ákæru, útgefinni af lögreglustjóranum á höfuðborgarsvæðinu 16. febrúar 2026, á hendur Daníel Þór Jónssyni, kt. […], 101 Reykjavík, fyrir fíkniefnalagabrot með því að hafa, þriðjudaginn 1. október 2024, við Hamraborg í Kópavogi, haft í vörslum sínum 30,55 grömm af amfetamíni sem lögreglumenn fundu milli fóta hans í aftursæti bifreiðar með skráningarnúmerið […].

Telst háttsemi þessi varða við 2. gr., sbr. 5. og 6. gr. laga um ávana- og fíkniefni nr. 65/1974.

Þess er krafist að ákærði verði dæmdur til refsingar og til greiðslu alls sakarkostnaðar.

Jafnframt er krafist upptöku á 30,55 grömmum af amfetamíni, sem hald var lagt á samkvæmt 6. mgr. 5. gr. laga nr. 65/1974.

Ákærði sótti ekki þing við þingfestingu málsins og hafði ekki boðað forföll en hafði verið birt ákæra og fyrirkall. Verður málið dæmt samkvæmt heimild í a-lið 1. mgr. 161. gr. laga nr. 88/2008 um meðferð sakamála enda var þess getið í fyrirkallinu að þannig gæti farið um meðferð málsins.

Með vísan til framanritaðs og til rannsóknargagna málsins telst framangreind háttsemi sönnuð og er hún rétt heimfærð til refsiákvæða í ákæru.

Ákærði er fæddur í […]. Samkvæmt framlögðu sakavottorði, dagsettu 12. febrúar 2026, var ákærða með dómi Héraðsdóms Reykjavíkur 4. apríl 2023 gert að sæta fangelsi í þrjá mánuði, skilorðsbundið til tveggja ára, og hann dæmdur til greiðslu sektar fyrir brot gegn almennum hegningarlögum nr. 19/1940, lögum nr. 50/1988 um virðisaukaskatt og lögum nr. 145/1994 um bókhald. Þá var ákærði með dómi Héraðsdóms Reykjavíkur 22. febrúar 2024 sakfelldur fyrir brot gegn almennum hegningarlögum nr. 19/1940, lögum nr. 65/1974 um ávana- og fíkniefni og vopnalögum nr. 16/1998. Brot þau er ákærði var sakfelldur fyrir í umræddum dómi voru hegningarauki við áðurnefndan dóm Héraðsdóms Reykjavíkur frá 4. apríl 2023, að undanskildu einu broti sem framið var eftir uppkvaðningu dómsins. Var skilorð dóms Héraðsdóms Reykjavíkur frá 4. apríl 2023 látið haldast og ákærða gert að sæta fangelsi í tvo mánuði, skilorðsbundið til tveggja ára. Að öðru leyti hefur sakaferill ákærða ekki þýðingu við úrlausn máls þessa.

Með broti sínu nú hefur ákærði rofið skilorð framangreindra dóma. Verður skilorðsbundin refsing dóms Héraðsdóms Reykjavíkur frá 22. febrúar 2024 tekin upp og ákærða gerð refsing í einu lagi, sbr. 60. gr. almennra hegningarlaga nr. 19/1940. Með vísan til sakarefnis máls þessa sem og 60. gr. almennra hegningarlaga þykir mega láta skilorð dóms Héraðsdóms Reykjavíkur frá 4. apríl 2023 haldast.

Með hliðsjón af framangreindu, sakarefni þessa máls og 77. gr. almennra hegningarlaga nr. 19/1940 þykir refsing ákærða hæfilega ákveðin fangelsi í 3 mánuði. Með vísan til 60. gr. almennra hegningarlaga nr. 19/1940 og þess að langt er um liðið síðan brot ákærða var framið þykir mega fresta fullnustu refsingarinnar og falli hún niður að liðnum tveimur árum frá birtingu dóms þessa haldi ákærði almennt skilorð 57. gr. almennra hegningarlaga nr. 19/1940.

Með vísan til lagaákvæða í ákæru eru gerð upptæk 30,55 grömm af amfetamíni.

Engan sakarkostnað leiddi af meðferð málsins.

Af hálfu ákæruvaldsins flutti málið Vilhjálmur Þór Svansson saksóknarfulltrúi.

Sigurbjörg Birta Berndsen, aðstoðarmaður dómara, kveður upp dóm þennan.

Dómsorð:

Ákærði, Daníel Þór Jónsson, sæti fangelsi í 3 mánuði, en fresta skal fullnustu refsingarinnar og falli hún niður að liðnum tveimur árum frá birtingu dómsins að telja haldi ákærði almennt skilorð 57. gr. almennra hegningarlaga nr. 19/1940, sbr. 4. gr. laga nr. 22/1955.

Ákærði sæti upptöku á 30,55 grömmum af amfetamíni.

Sigurbjörg Birta Berndsen