Dómstólaleit

Mál þetta, sem dómtekið var í dag, er höfðað með ákæru, útgefinni af lögreglustjóranum á Suðurnesjum 17. desember 2018, á hendur Nadeem Maqbool, f.d. [...], ríkisborgara [...], fyrir skjalafals og misnotkun skjala, brot gegn lögum um útlendinga og brot á lögum um atvinnuréttindi útlendinga sem hér greinir:

I.

Fyrir skjalafals með eftirfarandi hætti: i. Með því að hafa, þann 20. júní 2017, sótt um kennitölu til Þjóðskrár hjá Íslandsbanka hf., kt. 000000-0000, í nafni [...], fd. [...], ríkisborgara [...] og í blekkingarskyni, framvísað breytifölsuðu bresku vegabréfi nr. [...], á nafni [...], fd. [...], með gildistíma frá 19.11.2010 til 19.11.2020. ii. Með því að hafa, þann 18. ágúst 2017 undirritað og lagt inn til Þjóðskrár, umsókn   vegna   starfsráðningar,   fyrir   ríkisborgara   evrópska   efnahagssvæðisins (EEA/EFTA) um staðfestingu á réttmætri dvöl á Íslandi lengur en þrjá mánuði, í nafni   sama   aðila,   [...],   kt.   000000-0000,   og   í   blekkingaskyni,   framvísað breytifölsuðu bresku vegabréfi nr. [...], á nafni [...], fd. [...], með gildistíma frá 19.11.2010 til 19.11.2020. iii.   Með   því   að   hafa,   þann   18.   ágúst   2017,   lagt   fram   til   Þjóðskrár,   í blekkingarskyni, sem fylgigagn sbr. lið ii að ofan, starfssamningi við [...] ehf. [...], Reykjavík, á nafni sama aðila, [...], dags. [...], undirrituðum af ákærða og fulltrúa atvinnurekanda.

Telst   þessi   háttsemi   ákærða   varða   við   1.   mgr.   155.   gr.   almennra hegningarlaga nr. 19/1940.

II.

Fyrir skjalafals og misnotkun skjala, með því að hafa, mánudaginn 22. október   2018,   framvísað,   við   afskipti   lögreglu   af   honum   á   vinnustað   hans, veitingastaðnum [...],[...], Reykjavík, í blekkingarskyni, fölsuðu [...] ökuskírteini, á nafni   [...],   kt.   000000-0000,   með   gildistíma   frá   08.02.2017   til   07.02.2027   og debetkorti ánöfnuðu á sama aðila.

Telst þessi háttsemi ákærða varða við 1. mgr. 155. gr. og 1. mgr. 157. gr. almennra hegningarlaga nr. 19/1940.

III.

Fyrir skjalafals, með því að hafa, mánudaginn 22. október 2018, framvísað í framhaldi af afskiptum lögreglu vegna ákæruliðar II., að Skipholti 40, Reykjavík, í blekkingaskyni, breytifölsuðu bresku vegabréfi nr. [...], á nafni [...], fd. [...], með gildistíma frá 19.11.2010 til 19.11.2010.

Telst   þessi   háttsemi   ákærða   varða   við   1.   mgr.   155.   gr.   almennra hegningarlaga nr. 19/1940.

IV.

Fyrir   brot   gegn   lögum   um   útlendinga   og   lögum   um   atvinnuréttindi útlendingar, með því að hafa; i. Frá 23. ágúst 2017, dvalið í heimildarleysi á Íslandi, án áritana og dvalarleyfis, en ákærði kom sér í ágúst 2017 undan flutningi úr landi eftir að honum var synjað um alþjóðlega vernd. ii. Á tímabilinu frá júní 2017 til september 2018 starfað hér á landi, án heimildar, á persónuauðkennum [...], fd. [...],[...] ríkisborgara, með íslensku kt. 000000-0000, sem hann aflaði sbr. ákærulið I., sem hér greinir;

Telst þessi háttsemi ákærða í lið IV.i varða við 1. mgr. 49. gr. og 50. gr., sbr. a. lið 116. gr. laga um útlendinga nr. 80/2016 og í lið IV.ii varða við 4. mgr. 6. gr., sbr. a. lið 1. mgr. 27. gr. laga nr. 97/2002 um atvinnuréttindi útlendinga.

Þess er krafist að ákærði verði dæmdur til refsingar og til greiðslu alls sakarkostnaðar.

Farið var með mál þetta samkvæmt 164. gr. laga nr. 88/2008 og var það tekið til dóms án frekari sönnunarfærslu er sækjanda og verjanda ákærða hafði verið gefinn kostur á að tjá sig um lagaatriði og ákvörðun viðurlaga.

Ákærði hefur skýlaust játað brot sín. Sannað er með játningu ákærða og öðrum gögnum málsins að ákærði er sekur um þá háttsemi sem honum er gefin að sök og eru brot hans rétt heimfærð til refsiákvæða í ákæru.

Verjandi ákærða krefst vægustu refsingar er lög leyfa og gerir ekki kröfu um þóknun sér til handa.

Ákærði er fæddur þann [...]. Samkvæmt framlögðu sakavottorði dagsettu 17. desember 2018, hefur hann ekki áður gerst sekur um refsivert brot.

Við ákvörðun refsingar er litið til þess að ákærði hefur gengist greiðlega við broti sínu fyrir dómi og verður það virt honum til málsbóta.

Með hliðsjón af framangreindu, 77. gr. almennra hegningarlaga og sakarefni málsins þykir refsing ákærða hæfilega ákveðin fangelsi í 5 mánuði, en fresta skal fullnustu   refsingarinnar   og   falli   hún   niður   að   liðnum   tveimur   árum   frá uppkvaðningu   dóms   þessa   haldi   ákærði   almennt   skilorð   57.   gr.   almennra hegningarlaga   nr.   19/1940   sbr.   4.   gr.   laga   nr.   22/1955. Komi   til   afplánunar refsivistar ákærða skal draga frá henni gæsluvarðhald sem hann sætti með fullri dagatölu, sbr. 76. gr. almennra hegningarlaga, eins og nánar greinir í dómsorði.

Ákærði greiði málsvarnarþóknun skipaðs verjanda síns á rannsóknarstigi, Halldóru Aðalsteinsdóttur lögmanns, 147.560 krónur, að meðtöldum virðisaukaskatti.

Af hálfu ákæruvaldsins flutti málið Súsanna Björg Fróðadóttir aðstoðarsaksóknari. Benedikt Smári Skúlason, aðstoðarmaður dómara, kveður upp dóminn.

D Ó M S O R Ð:

Ákærði, Nadeem Maqbool, sæti fangelsi í 5 mánuði en fresta skal fullnustu refsingarinnar og falli hún niður að liðnum tveimur árum frá uppkvaðningu dóms þessa, haldi ákærði almennt skilorð 57. gr. laga nr. 19/1940, sbr. 4. gr. laga nr. 22/1955. Komi til afplánunar refsivistar ákærða Nadeem Maqbool skal draga frá henni gæsluvarðhald sem hann hefur sætt frá 23. október 2018 vegna málsins.

Ákærði   greiði   málsvarnarþóknun   skipaðs   verjanda   síns   á   rannsóknarstigi, Halldóru Aðalsteinsdóttur lögmanns, 147.560 krónur.