Dómstólaleit

Dómur

Mál þetta, sem þingfest var 2. júní 2026 og dómtekið sama dag, höfðaði lögreglustjórinn á Suðurnesjum með ákæru 1. maí 2026 á hendur ákærða, Jóni Þór Eymundssyni, kt. […], […],

I.

fyrir umferðarlagabrot með því að hafa, laugardaginn 21. desember 2024, ekið bifreiðinni […] sviptur ökurétti og óhæfur til að stjórna henni örugglega vegna áhrifa ávana- og fíkniefna (í blóðsýni mældist amfetamín 270 ng/ml og tetrahýdrókannabínól 13 ng/ml) um Njarðarbraut, Reykjanesbæ, þar sem lögregla stöðvaði aksturinn. Er háttsemin talin varða við 1., sbr. 2. mgr. 50. gr. og 1. mgr. 58. gr., sbr. 1. mgr. 95. gr. umferðarlaga nr. 77/2019.

II.

Fyrir umferðarlagabrot með því að hafa, mánudaginn 9. júní 2025, ekið bifreiðinni […] sviptur ökurétti og óhæfur til að stjórna henni örugglega vegna áhrifa ávana- og fíkniefna (í blóðsýni mældist amfetamín 105 ng/ml og tetrahýdrókannabínól 26 ng/ml) um Baldursgötu, Reykjanesbæ, þar sem lögregla stöðvaði aksturinn. Er háttsemin talin varða við 1., sbr. 2. mgr. 50. gr. og 1. mgr. 58. gr., sbr. 1. mgr. 95. gr. umferðarlaga nr. 77/2019. Þá er þess krafist að ákærði verði dæmdur til refsingar, til greiðslu alls sakarkostnaðar og til að sæta sviptingu ökuréttar skv. 99. gr. og 101. gr. laga nr. 77/2019.

Fyrir dómi játaði ákærði afdráttarlaust sök samkvæmt ákæru. Var því farið með málið að hætti 164. gr. laga nr. 88/2008 um meðferð sakamála og málið dómtekið án frekari sönnunarfærslu eftir að sækjandi og verjandi höfðu tjáð sig um lagaatriði máls og ákvörðun viðurlaga. Af hálfu ákærða er krafist vægustu refsingar sem lög leyfa. Þá krefst verjandi þóknunar að mati dómsins.

Með skýlausri játningu ákærða fyrir dómi, sem samrýmist rannsóknargögnum máls, er sannað að hann hafi gerst sekur um þá háttsemi sem honum er gefið að sök í ákæru og þar þykir rétt heimfærð til refsiákvæða.

Samkvæmt sakavottorði ákærða gekkst hann undir greiðslu tveggja 60.000 króna sekta hjá sýslumanninum í Keflavík með tveimur sektargerðum dags. 5. nóvember 2003 fyrir akstur sviptur ökurétti. Með viðurlagaákvörðun þann 25. febrúar 2004 var ákærða gert að greiða 130.000 króna sekt og að þola tólf mánaða ökuréttarsviptingu vegna ölvunaraksturs. Þá var ákærði dæmdur til greiðslu sektar að fjárhæð 800.000 krónur og til þess að þola 4 ára og 6 mánaða ökuréttarsviptingu vegna aksturs undir áhrifum áfengis og sviptur ökurétti. Þá var ákærði dæmdur í eins mánaðar fangelsi með dómi 26. nóvember 2004 fyrir akstur sviptur ökurétti. Með dómi 12. október 2005 var ákærði dæmdur í tveggja mánaða fangelsi fyrir akstur sviptur ökurétti og hraðakstur. Ákærði var dæmdur í 45 daga fangelsi, skilorðsbundið til þriggja ára, fyrir fíkniefnalagabrot með dómi 12. apríl 2006. Með dómi 24. apríl 2006 var ákærði dæmdur í þriggja mánaða fangelsi, skilorðsbundið til tveggja ára, fyrir þjófnaðarbrot. Ákærði var dæmdur í fjögurra mánaða fangelsi með dómi 15. desember 2006 fyrir akstur sviptur ökurétti og hraðakstur. Með dómi 15. október 2007 var ákærði dæmdur í sex mánaða fangelsi og sviptur ökurétti ævilangt, meðal annars fyrir akstur sviptur ökurétti, akstur undir áhrifum áfengis og akstur undir áhrifum ávana- og fíkniefna. Með dómnum voru áðurnefndir skilorðsdómar frá 12. apríl 2006 og 24. apríl 2006 dæmdir upp og ákærða gerð refsing í einu lagi samkvæmt 60. gr. almennra hegningarlaga. Ákærði var dæmdur í fimm mánaða fangelsi og ævilöng ökuréttarsvipting hans var áréttuð með dómi 18. nóvember 2008 fyrir akstur undir áhrifum ávana- og fíkniefna. Með dómi 4. júlí 2012 var ákærði dæmdur í 60 daga fangelsi fyrir að aka bifreið sviptur ökurétti. Ákærði var dæmdur í eins mánaðar fangelsi fyrir akstur sviptur ökurétti með dómi 5. október 2012. Brotið framdi ákærði fyrir uppkvaðningu fyrrnefnds dóms frá 4. júlí 2012, og var ákærða því gerður hegningarauki samkvæmt 78. gr. almennra hegningarlaga. Ákærði var dæmdur í sjö mánaða fangelsi og ævilöng ökuréttarsvipting hans var áréttuð með dómi 19. febrúar 2013 fyrir akstur sviptur ökurétti og undir áhrifum ávana- og fíkniefna. Ákærða var veitt reynslulausn 2. ágúst 2014 í eitt ár á eftirstöðvum refsingar 150 daga samkvæmt fyrrnefndum dómum frá 4. júlí 2012, 5. október 2012 og 19. febrúar 2013. Ákærða var með dómi dags. 3. desember 2018 gert að sæta fangelsi í 12 mánuði og að þola ævilanga ökuréttarsviptingu vegna aksturs sviptur ökuréttindum og undir áhrifum ávana- og fíkniefna. Með dómi þann 9. september 2019 var ákærða gert að sæta 20 mánaða fangelsis og að þola ævilanga ökuréttarsviptingu meðal annars fyrir akstur undir áhrifum ávana- og fíkniefna og akstur sviptum ökuréttindum, en um var að ræða hegningarauka að hluta. Loks var ákærði gerð 15 mánaða fangelsisrefsing fyrir akstur undir áhrifum ávana- og fíkniefna sviptur ökurétti. Þá var ævilöng ökuréttarsvipting hans áréttuð.

Verður refsing í máli þessu ákveðin með hliðsjón af téðum refsilokum, sbr. 3. mgr. 71. gr. almennra hegningarlaga nr. 19/1940. Að gættri þeirri lagagrein er ákærði nú í þrettánda sinn sakfelldur fyrir akstur sviptingarakstursbrot og í áttunda sinn fyrir akstur undir áhrifum ávana- og fíkniefna. Með hliðsjón af þeim sakarferli og að gættri 1. mgr. 95. gr. umferðarlaga nr. 77/2019 þykir refsing hæfilega ákveðin fangelsi í 2 ár.

Í ljósi framangreinds og með vísan til 99. og 101. gr. laga nr. 77/2019, er ævilöng ökuréttarsvipting ákærða áréttuð.

Þá ber að dæma ákærða til greiðslu alls sakarkostnaðar, en til hans telst 409.805 króna útlagður kostnaður ákæruvaldsins, þóknun Sveins Andra Sveinssonar verjanda ákærða hér fyrir dómi. Með hliðsjón af eðli og umfangi máls og að teknu tilliti til viðmiðunarreglna Dómstólasýslunnar nr. 1/2026 þykir þóknun verjanda hæfilega ákveðin 176.700 krónur að meðtöldum virðisaukaskatti.

Sóley Ólöf Rún Guðmarsdóttir aðstoðarmaður dómara kveður upp dóminn.

Dómsorð:

Ákærði, Jón Þór Eymundsson, sæti fangelsi í 2 ár.

Ákærði er sviptur ökurétti ævilangt.

Ákærði greiði 586.505 krónur í sakarkostnað, þar með talda 176.700 króna þóknun Sveins Andra Sveinssonar verjanda síns.

Sóley Ólöf Rún Guðmarsdóttir